Arsip Tag: essai

JOKOWI, KOK GITU?

PANAJOURNAL : OBROLAN SUKAB

Oleh Seno Gumira Ajidarma,

cerutu kretek

 

“Nggak abis pikir deh Dul,” Sukab lepasin kopiah, usap-usapin rambut, lantes pasang lagi kopiahnya, “bener-beneeeeerrrr nggak abis pikir.”

Jalanan mingsih rame meski kaga’ kayak tadi siang. Sembari nyamber mendoan, Sukab terusin doi punya omongan.

“Kirain Jokowi tuh temenan ame Ahok, eh pegimane rasenye Ahok sekarang ye? Ape cumak akibat pengin menang aje Jokowi tuh milih pasangan, bukannye ade ntu nyang namenye idealisme kek, kalah menang pokoknya keukeuh ame doi punya pendapetan.”

“Idealisme ntu ude kaga’ penting lagi Kab,” kate Dul Kompreng.

“Ape dong nyang penting? Kayak nyang tau aje ente.”

“Realisme, itu nyang penting sekarang!”

“Nyang pegimane tuh?”

“Liat aje Jokowi, nyang doi pikirin emang menangnya pacuan kuda,” kate Dul sembari puterin topinye, nyang depan jadi nyang belakang kayak anak a-be-ge nyang celanenye gombrong, “pekare nyang doi naikin bukannye kuda tapi bagal, doi kaga’ pikirin.”

“Bagal apaan emang?”

“Setengah kuda setengah keledai …  Lulus SD kaga’ sih?”

“Emang ade keledai di negeri kite?”

“Huss! Ntu mah perumpamaan, pasangannya nggak sealiran lagi.”

“Buktinye?”

“Lupe ye? Ntu kendiri nyang bilang ntu orang nyang jlomprongin Ahok!”

“Waduh! Iye ye! Kok bise ye?!”

“Ntu nyang dibilang realisme, kaga’ mikir nyang muluk-muluk, pokoknye bisa jalan atow nggak.”

Mang Ayat nyang kerjaannye kayak ngelapin gelas piring mulu bekerut jidatnye.

“Jokowi dulu orang biasa,” katenye kayak ngedumel sendiri, “sekarang Jokowi cumak politikus biasa.”

“Begitu ya Be?”

Mang Ayat emang sering dipanggil Babe, kali’ dianggep tuaan daripade nyang laen-laen.

“Yo-i! Meski nyang dipikir kali’ bukan ntu kursi presiden…”

“Apaan dong kalow bukan kekuasaan?”

“Proyek.”

Dul Kompreng kebuka mulutnye. Jangan ade laler lewat aje ntar. Sukab nyang nyautin jadinye.

“Proyek? Mangsudnye ape Be?”

“Ya doi musti mertahanin doi punye kursi presiden, ketimbang proyek-proyeknye jatoh ke tangan orang laen, nyang belum ketauan mau ape bise beresin ntu proyeknye nyang gede-gede. Ntu semue, kayak kereta api di pedalaman Papua, kan proyek penting ini bangse, Kab.”

Sukab bukak lagi kopiahnye. Ngeliat-liat dalemnye kayak nyariin ape nyang barangkali bikin gatel.

“Bise aje sih Be, bise aje …” Katenye.

“Cumaakkk ….. ?”

Bahlul sambil nelen ketan lupis main omong aje ampe nyaris keselak.

“Belon tentu piliannye ntu bener kalok maunya menang.”

“Kok?”

“Doi nyari massa kan? Nyari suare?”

“Iyalahyauw!”

“Massa itu emangnye kaga’ tau diakalin kayak begitu!”

“Tau nggak emangnye?”

“Ya kubu lawan kan bisa ngasi tau toh? ‘Sebenernye bukan pimpinan ente-ente ntu nyang dimauin Jokowi, tapi suare ente-ente, demi kepentingannye kendiri’, nah, kalow gitu bise ragu toh suare-suare itu? Apelagi kalow kubu lawannye ngomong lagi. ‘Nyang ente dukung rame-rame dulu ntu gue! Nape ente-ente jadinye dukung ke sono?!’”

“Relawan nyang dulu dukung doi juga pasti kepecah, karena tak mungkin semua orang suka nyang jatuhin Ahok.”

“Nah!”

Semangkin malem semangkin banyak nyang kluar masup ntu warung. Nggak semue orang ngomongin politik, tapi politik ntu ikut ngebawa nasib semua orang.

Pondok Ranji,

Selasa, 14 Agustus 2018. 22:51

 

@sumber : Panajournal

Iklan